很久沒有寫過沒有營養的文章。(謎之聲:你有寫過有營養的文章嗎?)

如題,如果我有微博,那麼這一星期就會這樣寫:

2 月 28 日 (一) 返工。密謀愛瘋大行動,諗住cut pocket wifi,食昼個陣問下幾時到期,佢話今個月,即刻打去話cut,話搵人覆番我。跟住買車仔麵番去office 食。夜晚食四方雲集,都幾難食,煎鍋貼白雪雪0既?之後上堂,阿sir 都幾搞笑......

3 月 1 日 (二) 返工。lunch time 同隔離位去食越南野,飲0左椰汁綠豆冰,肥爆。內疚得濟,所以晚飯食東菇米粉同油菜全走。睇 Dream High 大結局。電訊公司覆番我,到期日唔係今年,係下年,cut 的話要罰一千,呆0左。同熊弟商討對策,都繼續唔知點算好。係,唔好同熊主提呢件事,因為呢個係密謀大行動,要先斬後奏 okay? 寫韓文作文。要寫400-600 字。寫幾隻字就「工具」 - 「字數統計」,寫到十二點都係寫0左100字。想嘔,想喊,及想死。極無心機,於是去訓覺。史無前例冇病都十二點前訓到。

3 月 2 日 (三) 返工。老闆放假,所以可以寫下貓。lunch time 同隔離位去食茶餐廳食茶餐 (係lunch time 都有茶餐)。放工返到屋企食外賣。韓文先生貓我,叫我做十題改錯練習同五條問答,又提我你好做作文啦喎,次次都話冇時間!仲有四份三,都唔知仲可以寫 咩.... 咦?冇奶油寫咁多字都係100 字架?噢!原來睇錯0左「字數」,應該睇「字元數(不含空白)」嘛~ 原來作0左 200 幾近300 個字啦!寫到十一點幾搞掂!跟住睇一集《天堂牧場》,十二點訓。

3 月3 日 (四) 返工。lunch time 睇0左一陣《我的公主》花絮,跟住自己去茶餐廳食肉餅飯,34 蚊都唔錯。因為趕住去上普通話,食得急得濟成個下昼都胃痛。阿老師吹水吹得好厲害,咁我咪拎個十題改錯練習出黎做,睇多次篇作文同溫韓文生字。返屋企途中 收到日文翻譯功課,改0左十個地方,都係好低能的同可以避免的錯,例如「歓迎宴を出席し」的「を」應該係「に」之類。但係冇分數0既?淨係得「とてもよく かけましたね」唔知係咪日本人式的稱讚。返到屋企執好份作文同打好個答案貓俾韓文老師。期間熊主返黎叫外賣。睇0左一集《midas》 同《天堂牧場》,練0左一陣kara 的「love is」呀之類。訓覺。

3 月 4 日 (五) 返工。lunch time 又睇0左一陣《我的公主》花絮,跟住自己去買粥油菜炸兩,飽到想嘔!放工返到屋企第一時間做韓文能力試模擬試題。嘩!發生咩事?上一個試題係幾乎全部都唔 識。因為冇個字睇得明,想估答案都估唔到。今次唔查字典,成績係語彙及文法 22/30 寫作 (未計作文) 8/10!唉呀!我以為一定會全軍覆沒,所以冇報到考能力試喎!做做下熊主買0左外賣返黎。睇0左一集midas ,又上0左陣網,誤打誤撞搵到 ilovejyj.com 的 channel 韓文聽到半成,睇0左一陣好似冇咩特別。訓覺。

3 月5 日(即今日)十點半起床,吃早餐,交管理費,拎衫去洗。返黎做普通話口頭報告的 powerpoint,發現同組同學仔打埋我個份,咁我樂得執下呢呢路路半個鐘就搞掂。又繼續做韓能試試題。聽解 23/30 閱讀理解20/30。可以好肯定今次題目淺。呢本模擬試題都幾奇,第一個練習深到爆,第二個忽然淺成咁。做完繼續溫韓文,打0左份副詞筆記,完成度係1 /4。睇0左半集sign 出門口上韓文。好肚餓,食0左塊朱古力。老師講0左改錯練習先,簡單黎講因為我做得好hea 所以冇咩邊條岩..... 作文,佢話我作得好好,仲問我係咪自己作。「정말 둘이 먹다가 하나가 죽어도 모를 만큼 맛있습니다.」佢問我點識寫呢句,我話我岩岩學完咪識0羅,仲澄清我真係自己寫,最多都係寫完有查下字典確認下咁咋。佢隨後都話我有唔少打錯字..... 跟住佢就教慣用語,佢問十條我有七八條都識,咁佢就話我仲識得多過另一個打算考高級試的同學仔。放學就去買化妝品,呢輪收心養性0左好多,冇再亂咁買。之 後就同熊主熊主爸媽食飯。返屋企個陣我沾沾自喜同熊主講番上堂的情形,熊主就話:佢驚你讀讀下唔讀,所以咪讚你[乙水]下你之嘛。

就係咁啦,你話我0既生活係咪好無聊?咁開咩鬼微博呀!

Posted by 紫熊 at 痞客邦 PIXNET Guestbook(0) 人氣()