紫熊部屋

歡迎致電任問唔嬲日語學習查詢熱線，廣東話請按一字。

1. 嘩！一級！咁你咪好勁？冇野可以再學架啦喎？

參考答案：(靦腆地) 梗係唔係啦！一級合格根本唔代表 d 咩。你夠有考會考英文啦！咁你英文係咪好勁？冇野可以再學架啦喎？

2. 嘩！你學左咁耐，睇日劇唔駛字幕啦？

參考答案：咁你學左英文咁耐，睇美劇唔駛字幕啦？

3. 嘩！你日文咁叻，去日本旅行一定冇問題啦？

參考答案：就算你唔識日文，去日本旅行都唔會有咩問題架喎！

4. 學日文難唔難架？

參考答案：有邊種語言唔難學？有講聲我知喎！

5. 學日文有咩用？

參考答案：冇用唔學得架咩？

6. 你做野用到日文咩？

參考答案：用唔到架！咁我唔係學咩都要同工作有關卦？

7. 咁你可以教日文架啦喎！

參考答案：我想教熊文多d！起碼我真係識。

8. 咁日本你咩都知架啦？

參考答案：學日文，唔等於熱愛日本文化，又唔等於係日本通架喎！

9. 咁你咪一定成日去日本？

參考答案：我都想呀！唔駛做呀！

10.  喂！你講句日文黎聽下？

參考答案：痴線！冇啦啦係條街度講咩日文？

****

自從學習日本語以來，以上問題我大概要回答至少數十次。但所謂「參考答案」，顧名思義，就只能作參考，雖然心裡對於重複回答問題感到不勝其煩，但仍不厭其煩耐心解答。說到底，只是為打開話匣子而已，不是嗎？